شباب مصر المخلصين والمبدعين .. تحت رعاية وزارة الشباب والرياضة ووزارة الثقافة المصرية، سعداء إننا بنعلن عن فتح باب التطوع لمعرض القاهرة الدولى للكتاب فى الدورة الـ للسنة السادسة علي التوالي لتواجد برنامج التطوع لمساعدة الجمهور والمساهمة في العملية التنظيمية للمعرض.
تفاصيل برنامج التطوع بمعرض القاهرة الدولى للكتاب
وعلشان الدورة تخرج بالشكل اللى يليق بقيمة مصر وشعبها، بنكون فخورين جدا بمشاركة شباب مصر معانا فى فريقنا بجهودهم التطوعية اللى كل سنه بتنور وتشرف مصر قدام العالم
طب ليه ممكن اتطوع فى معرض القاهرة الدولى للكتاب ؟ .. احنا هنقولك ليه ، اولا معرض القاهرة للكتاب هو اقدم معرض للكتاب فى افريقيا والشرق الاوسط، فعالية مهمة ليها بتحصل كل سنة وليها شهرة دولية بيكون الجميع حريص انه يشارك فيها او حتى يحضرها.. من 53 سنه وإحنا على الحال ده .
ثانياً.. دلوقتي انت بعد ما بتخلص الدراسة الجامعية و تيجي تبتدي مشوارك المهني بتيجي تقدم على أي وظيفة 90 % من الوظايف بتكون محتاجة خبرة .
طب انت كواحد حديث التخرج هتجيب الخبرة منين ؟!
هو دة دور الأعمال التطوعية انها تديك خبرة في مجالات متعددة و اللي ممكن اي حد في الدنيا يعملها سواء كنت لسه طالب او متخرج .
- حياتك الجامعية تتراوح من 4 ل 5 سنين في الغالب دي فترة كافية أوي ان انت تنمي نفسك في كذا مجال عن طريق الأعمال التطوعية .
- ممكن تتطوع فى جمعيات او فى الجامعة .. و ممكن تتطوع و تدرب تبع الحكومة و ده بيبقى افضل و اعلى الانواع و بيفرق اوى ف الـ cv بتاعك.
العمل التطوعى هيخليك في اعلي درجات التركيز زيك زى الضغط الوظيفي في الحياة
المهنية الحقيقية بظبط ..عشان لما تروح اى شركة و تعمل الانترفيو يبقوا عارفين ان الشخص ده واخد خبرات و مر بتجارب حقيقية .
وعلشان تقدم على منحة برة مصر و انت لسه مش بتشتغل لازم جواب توصية .. فهتقدر تاخد جواب توصية من مدير المشروع اللى انت كنت متطوع فيه .
غير ان الـ CV بتاعك لو مفيهوش أي أعمال تطوعية او انشطة لخدمة المجتمع غالبا بيترفض و خصوصا لو انت عايز تسافر برا تكمل دراستك او تشتغل .. يبقى العمل التطوعي دة واجب عليك كطالب أو شخص لسه بيدور على وظيفة أو متوقع إن هيكون ليه مستقبل مهني إن شاء الله .
وزارة الشباب والرياضة بالتعاون مع وزارة الثقافة بتديك فرصة العمر، انك تاخد تدريب و خبرة عمل ميدانى و انك تدرب فى مشروع حكومي اللى هو اكبر فعالية ثقافية بتحصل في مصر و هو معرض القاهرة الدولى للكتاب.. و كمان هتاخد شهادة معتمدة من الحكومة بعد ما تخلص.
التطوع مش بياخد من وقتك كتير و هتحس انك بتستغل وقت كده كده هتضيعه و في نفس
الوقت بتتعلم و بتاخد خبرة و بتبني علاقات و تعرف ناس جديدة و بتاخد أفكار جديدة في حياتك .
البرنامج تحت رعاية وزارة الشباب والرياضة بتتعاون فيه وزارة الثقافة والهيئة المصرية العامة للكتاب.
علشان كده هندرب جيل من الشباب علشان يكونوا فريق متطوع النهاردة على اعلى مستوى ويكون ليهم مستقبل كبير فى العمل العام والوطنى والمجتمعى وقادرين على تولى المسئولية فى اقرب وقت ..
مدة معرض القاهرة الدولي للكتاب 2023
هتكون 14 يوم بداية من يوم 25 يناير 2023 .. والمتطوعين هيتقسموا مجموعتين كل
مجموعة هتنزل 7 ايام بالتناوب مع المجموعة التانية لمدة 8 ساعات يومية.
وزارة الشباب بتقوم بتوفير الزى المميز للمتطوعين ووجبة يومية ووسيلة انتقال يومية
من ميدان التحرير الى مقر المعرض بمركز مصر للمعارض الدولية
لا يقدم البرنامج أى مقابل مادي تحت اى مسمى.
السن المطلوب من 16 وحتى 25 سنة.
تواريخ تهمك :
فتح باب التسجيل : الثلاثاء 20 ديسمبر 2022.
غلق باب التسجيل : الاحد 25 ديسمبر 2022.
المقابلات الشخصية : 27 و 28 و 29 ديسمبر 2022.
التدريب : يحدد لاحقاً.
أيام العمل: 24
يناير وحتى 6 فبراير 2023.
لجان متطوعى برنامج انا متطوع - شباب معرض القاهرة الدولى للكتاب I Volunteer Egypt
المتطوعين ليهم مهمتين .. على اساسهم انت بتختار اللجنة المناسبة ليك :
١- لجنة التنظيم والمعلومات : يتمثل دور أعضاء هذه اللجنة بإرشاد الجمهور وفقاً للنظام
الموضوع لإدارة المعرض وكذلك تنظيم الكثافات وتنظيم عمليات الدخول والخروج وتطبيق
ومتابعة تطبيق الاجراءات الاحترازية داخل وخارج صالات المعرض.
٢- لجنة التوثيق الاعلامى: تتولى مهمة التصوير الفوتوغرافى والفيديو والمونتاج والجرافيك
والتصميم للعمل اليومي للمعرض.
- بعد تسجيلك في الاستمارة هنبعتلك معاد الانترفيو ومكانه علشان تعمل المقابلة الشخصية،
وبعد الانترفيو هنبلغك علطول انك معانا ولا لا ، وهيكون فيه برنامج تدريبى علشان
تعرف كل التفاصيل عن المعرض وكواليسه ومهامك بالتفصيل.
