فرصة للتطوع في مراكز رسالة للتدريب التابعة لجمعية رسالة الخيرية Resala Training Centre RTC Volunteer

يناير 4, 2024

Apply for this job

الموعد النهائي للتقديم

الوصف

احنا مركز تدريب تطوعى  مجانى تماما تابع لجمعية رسالة للأعمال الخيرية ، جميع القائمين على الدورات التدريبية من منظمين و مدربين و تسويق و خلافه متطوعين و عشان كدا كورساتنا مجانية تماما 

لو حابب تتطوع معانا و تكون جزء من العلم دا بنية الصدقة الجارية و بنيه انه يكون علم ينتفع به يبقى لازم تطوع معانا 

لو عايز تستفيد خبرات جديدة و تكون شبكه علاقات قوية و تستفيد بوقتك و تاخد شهاده خبرة بدا كمان يبقى هنستناك معانا  

إتخرجت من الجامعة جديد و لسه مشتغلتش، أو اشتغلت عادى، بس لسه عندك وقت فاضى 

عايز مكان تقدر تفيد فيه غيرك بوقتك و مجهودك، و تستفيد منه و تطور من نفسك

اكيد فكرت كتير و قررت انك تتطوع 

قرار هايل

بس السؤال هنا هتطوع فين 

الاختيارات قدامك كتير و مختلفة 

بس ازاى تختار المكان صح ؟! 

أول حاجة قبل اختيار المكان لازم تحدد هدفك من التطوع، وتعرف انت عايز تتطوع ليه 

هل دا علشان وظيفه معينة او علشان تكتسب خبرة، او تتعرف على ناس جديدة

▫️مكان التطوع لازم يكون أهدافه و رسالتة متفقة مع أهدافك و رسالتك لأن التطوع مش من أجل الآخرين بس، دا علشانك انت كمان 

  1. ▫️نيجي بقي لمجال التطوع يفضل إن يكون قريب من مجال عملك أو مجال إهتمامك  
  2. فلازم تاخد دراستك و مهاراتك في دماغك و انت بتختار 
  3. ▫️ تحديد الوقت اللى هتقدر تطوع بيه مهم جدا و دا هيساعدك على الالتزام بتطوعك لفترة زمنية اطول 
  4. ▫️يفضل المكان اللى هتتطوع فيه يكون بيقدم شهادة تطوع موثقة،  لان دا هيفيدك في ال CV بتاعك ، وكمان يكون متوفر  دورات تأهيلية للمتطوعين و يا سلام لو ليها علاقه بمجال دراستك أو اهتماماتك

اكيد عرفت دلوقتي هتطوع فين 

كل النقط اللي اتكلمنا عنها  هتلاقيها عندنا في rtc 

علشان كدا  فتحنا باب التطوع من تاني  

كل اللي عليك بس تسجل من خلال اللينك وهنتواصل معاك في اقرب وقت  

وخليها اول خطوة في تغير حياتك  

أما التطوع ده حكايته حكاية…

ده حاجة كدة بتديك كتير و أنت في البداية بتبقى فاكر إنك انت اللي هتديها.

بتعدي عليك( 70) student activity من وقت ما كنت في الفرقة الأولى، و أنت شايف إنك ماعندكش وقت ولا كأن الأسهم بتاعتك في البورصة هتقع من الكام ساعة بتوع التطوع دول.

تخيل إنك بدلت الـ ٣ ساعات بتوع السوشيال ميديا “كحد أدنى” بالتطوع لمدة شهر بس و شوف كم الحاجات اللي هتفيدك بـ ده، كمية علاقات مهولة و بالذات لو أنت في نشاط كورسات و بيدخلك أقل حاجة ١٠٠ شخص أسبوعيًا، تخيل حجم الاستفادة هتبقى عاملة إزاي. ✨

و في Rtc عندنا متطوعين مستمرين لـ ١١ سنة تطوع، و فيه اللي شاف إن كرم ربنا في التطوع، و الرزق بالشغل في التطوع و الرزق بالتفوق بالتطوع.❤️ 

فـ ركز إنك تغير لـ أسلوب حياة ماتندمش عليه بعد كدة. 

و لو ليك حكاية في التطوع أكيد هنحب نسمعها. ❤️

يلا سجل معانا في الفورم وخد الخطوه اللي مش هتندم عليها واستفيد بوقتك

التطوع في مراكز رسالة للتدريب التابعة لجمعية رسالة الخيرية Resala Training Centre RTC Volunteer

التطوع كفكرة بيكون هدفها مساعدة غيرنا ،لكن هو أكبر من كدة لأن التطوع بيساعدك انت أكتر من غيرك 

وده لأنه بيكشفلك جوانب من نفسك مكنتش تعرفها وبتكتشفها نتيجة العطاء والسعادة اللي بتشعر بيها وقت عمل خدمة أو مشاركة تفيد تغيرك

ده غير المستوى العملي اللي هيتطور بشكل سريع وملحوظ لأن مشاركاتك التطوعية هتوفرلك قدر كبير من المعرفة والخبرات اللي هتضيف لقدراتك وتهيئك لسوق العمل بشكل سريع 

عشان كدة لازم تكون خطوة التطوع من ضمن أهدافك الحالية 

أسلوب حياتك بقرار جديد هيبقى غير.

و دلوقتي بدأنا نفتح أبواب التطوع في ال Rtc من تاني ، و في كل اللجان علشان تختار اللي يناسبك 

 و هيساعدك الـ HR في اختيار شغفك المناسب و المكان المناسب ليك. 

يعني لو حسيت إنك مش عارفة تبدأ إزاي رغم career الجامعة، ف ماتخافش مع إخواتنا الـ HR اللي هيعرفوا يتعاملوا معاك إزاي بناءًا على خبرتهم المهنية في رسالة و برة رسالة. 

٣ ساعات أسبوعيًا هيغيروا حياتك بشكل ماتتخيلوش، هتبقى بتقرأ البوست ده و تقول أنا أحسن من غير تطوع، بس دا مش صح لان  رسالة من كل متطوع لحد اللي بيكتب دلوقتي ده،  فا بيقولك اننا كلنا محتاجين ندور و نفكر إزاي نطور من نفسنا، و طول ما أنت ماعشتش التجربة بنفسك طول ما الموضوع هيبقى بالنسبة ليك مختلف. 

و إحنا كـ RTC هنبقى سعداء جدًا و إحنا بنكتسب متطوع جديد و شخص أكيد فيه شيء فريد كان سبب في إن ربنا يخليه مسؤول عن عمار الكون و كمان يوفقه للتطوع. 

ف إحنا مستنينك في فروعنا يوميًا علشان تبدأ أول خطوة للتطوع معانا 

وخلينا نقولك اهلًا بيك كـ عضو فعال في الدنيا يا صديقي. 

يلا من غير تفكير ادخل املي الاستمارة وهنتواصل معاك علي طول 

لو كنت شخصية قيادية وبتحب مجال الإدارة والتنظيم ف البوست دا ليك.

جهز قهوتك وركز معايا☕✨

معانا في مركز RTC بنقدملك فرصة إنك تطوع معانا وتكون جزء من لجنة التنظيم واللي بتكون عبارة عن..

  • تنظيم مواعيد الكورسات.
  • إنشاء جروب للمتطوعين والمشتركين.
  • هتكون مسئول عن غياب وحضور المستفدين من الكورسات.
  • تحديد مواعيد الكورسات بالأتفاق مع المدربين.
  • متابعة التاسكات.
  • مساعدة المدربين.
  • شرح مهمام المركز وتخصصات الكورسات.

حبيت أوضحلك جزء بسيط من دورك في لجنة التنظيم؛ فكمل قهوتك وتعالى أوضحلك هتستفاد ايه من التطوع معانا..

هيكون عندك خبرة كفاية تخليك تقدم في أي شركة.

الثقه بالنفس وتكوين علاقات جديدة.

هتتعامل مع أشخاص في نفس مجالك.

كسر حاجز الخوف.

يلا مستني ايه سجل معانا علشان تكون جزء من عيلتن باللينك ده وهنكلمك.  ♥️

فروع التطوع في مراكز رسالة للتدريب RTC

الفرع اللى حابب تتطوع فيه

  • فيصل
  • مصدق
  • الجيزة
  • اكتوبر
  • مصر الجديدة
  • مدينه نصر
  • المعادى
  • حلوان
  • اسكندرية

مجالات التطوع في مراكز رسالة للتدريب RTC

ايه التخصص اللى ممكن تتطوع معانا فيه  ؟

  • الاستقبال
  • تدريب كورسات كمبيوتر
  • تدريب كورسات لغات
  • تدريب كورسات تنميه بشريه
  • تدريب كورسات اونلاين
  • تنظيم داخل الفرع
  • تنظيم اونلاين
  • التسويق (فريق الديزاينر)
  • التسويق (فريق كتابة المحتوى)
  • التسويق (فريق المودريتور)